Lou “Zou boulegan!” d’Helsinki pèr la diverseta dei lengo dins la coumunicacien saberudo
La recerco es internaciounalo. E nous agrado ansin! La diverseta dei lengo mantèn vivo la recerco que toco ei besoun de l’endré. La fau apara! Espandi lei resulto de la recerco dins la lengo vouestro a d’eficàci. Fès n’en la bello provo! Es mai-que-mai impourtant d’agué d’escàmbi ‘mé la soucieta emai de parteja lou sabé fouero lou mounde saberu. Va fau enança! Lou maiun de la coumunicacien saberudo en lengo naciounalo e regiounalo es gaire soulide. L’abandounen pas!
Aquélei que signon lou “Zou boulegan!” d’Helsinki pèr la diverseta dei lengo dins la coumunicacien saberudo afourtisson aquélei recoumandacien d’aqui pèr que siegon adóutado pèr lei decidaire poulitique, lei menaire, leis universita, leis istitucien de recerco, lei finançaire de recerco, lei bibloutèco, e lei cercaire.
1. Sousteni l’espandimen dei resulto de la recerco pèr l’interès majour de la soucieta
- S’assegura que lei cercaire an d’estimo quouro espandisson lei resulto de la recerco fouero lou mounde saberu e quouro an de liame ‘mé la soucieta, la culturo, lou patrimòni.
- S’assegura que lei counouissènci scientifico soun pourgido à egalita dins uno diverseta de lengo
2. Apara lei maiun naciounau e regiounau que permèton de publica lei recerco necito pèr lei besoun de l’endré
- S’assegura que, sènso cerca proumié lou gasan, de revisto e tambèn de publicaire de libre an proun de mejan e de soustèn pèr garda de gràndeis eisigènci de qualita e d’ounesteta dins la recerco.
- S’assegura de la sauvo-gàrdi dei revisto e dei publicaire naciounau e regiounau que fan sa mudo pèr l’óuferto à gràtis.
3. Enança la diversita dei lengo dins l’avalouramen de la recerco e lei sistèmo de finançamen
- S’assegura que, quouro avalourado pèr d’especialisto, la recerco de grosso qualita, si regardo pas sa lengo o soun maiun de publicacien.
- S’assegura que, quouro de sistèmo de coumtàgi soun emplega, acò tèn comte tambèn dei revisto e dei libre dins tóuti lei lengo.
Lou “Zou boulegan!” d’Helsinki pèr la diverseta dei lengo dins la coumunicacien saberudo es esta alesti pèr la Federacien dei Soucieta Sabènto de Finlando (TSV), lou Coumita d’Enformacien Publico (TJNK), l’Assouciacien Finlandeso pèr l’Edicien Saberudo, lei universita de Nourvèjo (UHR) emai lou prougramo COST (Entrajudo éuroupenco pèr la Sciènci e la Teinoulougié) que li dien “Maiun éuroupen pèr l’avalouramen de la recerco en sciènci soucialo e umano” (ENRSSH).
La campagno “Dins tóuti lei lengo” es un rampèu pèr esviha lei decidaire poulitique, lei menaire, leis universita, leis istitucien de recerco, lei finançaire de recerco, lei bibloutèco, e lei cercaire, pèr fin d’empegne la diverseta dei lengo dins la coumunicacien scientifico. Li poudès participa: basto manda sus Twitter o Facebook voueste soustèn o tambèn aquéu de vouèstei counfraire pèr la diverseta dei lengo dins la coumunicacien saberudo. Ato puei, osco seguro, dins tóuti lei lengo (#InAllLanguages)!
Revira au prouvençau pèr / Translated into Provençàal by
Philippe Blanchet, université Rennes 2, Bretagne (Breizh / Bertègn), France.
philippe.blanchet@univ-rennes2.fr